KAROL GWÓŹDŹ



KAROL GWÓŹDŹ

ŚLŮNZOK, PO KERYM IDŹE SPOZDOWAĆ ŚE MOCKA ARTYSTYCZNYCH DŹAŁAŃ. TO JEDYN Z WOŻŃEJSZYCH LUDŹI ŚLŮNSKIJ BINY ELEKTRŮŃICZNYJ MUZYKI, TO TYŻ JEDYN ZE BARZYJ ZOCNYCH TWŮRCŮW ŚLŮNSKIJ LITERATURY.

Rodzůny we Katowicach, nale cołki żywot zwjůnzany ze Śymjanowicami Ślůnskimi. To pisorz, poeta, dj i producynt muzyczny, kery tworzy muzyka elektrůńiczno, fest zwjůnzany z gatůnkami ambient, electro i techno.

Do śwjata muzyki napoczoł właźić już za bajtla, coby ńyskorzyj, skuli fascynacyje breakdance i electric boogie, uodnojść śe w muzyce elektrůńicznyj. Jeszcze jak bůł 17 lot stary, jako fanatyker winylowych płytůw, zaczyno szpilać jako dj w klubach muzycznych w cołkij Polsce. Wystympuje pod mjanym „Nail”. Styl, kery prezyntuje w setach to electro, ze źdźebko inkszymi gatůnkami. Charakteryzuje go miszůng w bajstlowańu włosnych kůmpozycyji i roztůmajte style muzyczne.

Przodźij, kjej mjoł 14 rokůw, uodkrywo w śebje tyż inkszo grajfka, zwjůnzano ze szkryflańym. We 2005 roku debjutuje za postrzedńictwym „Gazety Wyborczyj” ślůnskim wjerszym „Uůna” (pjyrszo wersyjo szkryftu „Ona”), czym przićůngo ku śebje pozůr medyjůw (m.in. Telewizja Polska, Radio Piekary), kere podkreślajům jego uoryginalny, mankulijny styl szkryflańo. „Towarzystwo Opieki nad Oświęcimiem” publikuje w jednym ze swojich poczytnych bjuletynůw (Nr 47 „Numery jeszcze mówią po 60-ciu latach”) szpecjalńe szrajbńynty wjersz „Ziymio z Auschwitz”, kery w cołkij historyji Towarzistwa bůł jedynym ńyszkryfńyntym po polsku. Jeszcze tego samego roku uostowo laureatym „Konkursu Poetyckiego im. ks. Norberta Bonczyka”. We 2010 roku nakładym Wydawńictwa Hologram wydowo swůj pjyrszy tůmik poezyje „Myśli ukryte”, kery wypołńajům refleksyjno-nostalgiczne wjersze, szkryfńynte we alfabeće dr Feliksa Steuera. Publikacyjo ta uostowo przyjynto fest przychylńe bes czytelńikůw i krytykůw, m. in dźynki modernymu podejśću Karola do ślůnskij literatury.

We 2012 roku irlandzko wytwůrńa wydowo ambjyntowy albům „Tamte Czasy” i zbjero ku tymu mocka dobrych recenzyji uod krytykůw na cołkim śwjeće. Ńyskorzij jego kůncek „Gůrnoślůnskje Tragedyje” uostowo użyty we filmje „Beat Girl” z 2013 roku, kery uostoł nůminowany do nagrody Emmy.

Press photo



Kůntakt



Ńiżyj znojdźesz wszyjsko, co dźynńikarzowi trza do roboty. Srogi zestow informacyjnych materyjałůw, bildy wysokij jakośći i kůmpleksowo bjografijo. Jak bydům potrzebne dodatkowe informacyje, dej znać.